Hargeysa(Xogsoor Media.Net):-Musharraxa jagada Madaxweynahaee Xisbiga Mucaaridka ah ee WADDANI Dr.Cabdiraxmaan M.Cabdillaahi (Cirro) iyo wefti ballaadhan oo uu hoggaaminayo, ayaa galabta socdaal ugu baxay dalka Itoobiya, ka dib marti-qaad rasmi ah oo uu ka helay Raysalwasaaradaha dalkaasi Mr.Hailemariam Desalegn.
Socdaalkan Musharrax Cirro, ayaa waxa ku wehelinaya hoggaamiyaha Xisbiga WADDANI Md.Xirsi Cali Xaaji Xasan,Pro.Maxamed Alla-bari oo isna ka tirsan hoggaanka sare ee Xisbiga WADDANI, xoghayaha arrimaha dibadda Xisbiga WADDANI Dr.Maxamed Cismaan Fadal iyo sida oo kale madaxa hawl-wadeenada shaqaalaha ee Murashax Cirro Aqoonyahan Baashe Yuusuf.
Murashax Cirro iyo weftigiisa, ayaa la filayaa in ay dalka Itoobiya ku maqnaadaan muddo dhowr cisho ah, waxaana la filayaa in halkaas kulamo khaasa kula qaadan doonaan raysal wasaaraha dalka
Socdaalka weftiga Musharax Cirro ayaa ku soo beegmay ka soo noqoshada dalka Itoobiya wefti kale oo uu hoggaaminayay musharaxa jagada Madaxweynaha Xisbiga KULMIYE Muuse Biixi Cabdi oo socdaal laba maalmood qaatay ku tegay dalka Itoobiya isla markaana kulamo la yeeshay intay dalkaa joogeen madaxda Itoobiya oo uu ugu horreeyo Raysal-wasaaraha dalkaas Hailemariam Desalegn.
Maaha markii ugu horraysay ee madaxda asxaabta Somaliland ay isu waydaartaan socdaalada dalka Itoobiya.
Xogsoor Media.Net
Hargeisa Somaliland