Hargeysa(XogsoorMedia.Net):-Mudadii ay Jamhuuriyadda Somaliland la soo noqotay madaxbannaanideeda ee dhidibada loo taagay qaranka Somaliland 1991,dii. Illaa maanta waxay soo martay marxalado kala duwan oo lagu soo noolaynayo dhismaha qaran laga bilaabay eber iyo meel aanay waxba oollin.
Waxaana lagu soo dhisay dawladnimada iskaashi iyo wada jir,iyadoo cid waliba halkii ay shaqo ahaan xirfada u lahayd ay sagxada ka soo bilawday.
Waxbarashada iyo tacliinta ayaa laga soo bilaabay in geed hoostii ardayda dugsiyo looga dhigo oo lagu bilaabo waxbarasahda aasaasiga ah inta dhismayaasha burbursan laga gurayo ugu yaraan waxbaabaha qarxa iyo guryaha oo burburkoodii ku dunsan yahay taasoo ay la qabeen goobaha waxbarashadu dumintii iyo baabiintii uu taliskii Siyaad Barre u gaystay guud ahaan gayiga Somaliland.
Waxaa ku xigtay markii dhismayaasha hoostooda la nadiifiyay in guryaha oo bilaajiingad ah jaajuurkii ka dumay iyo dhagaxaan ardaydu ay ku fadhiisanaysay oo sidaa isguulo guryo dul bannaan ah lagu yagleelay.
Waxbarashada Somaliland ee maanta illaa heer Jaaacado tiro badan oo kala duwan maraysa ayaa halkaa laga soo bilaabay markasta masuuliyiinta jooga ayaa shaqada wax ku sii darayay.
Haddaba maanta oo tacliinta Somaliland ay marayso meel aad u wanaagsan marka loo eego marxaladihii ay ka soo gudubtay ayay hadana dhaliilo badani ay dul-yaallaan oo ka imanaya qaybo badan oo bulshada ka mid ah,kuwaasoo ku dhaliila in qorshe xumo ka jirto hagista siyaasada waxbarashada qaranka iyadoo dhaliilaha ugu badan ee ay bulshada qaarkeed u soo jeediyaan ay ka mid tahay in aanay jirin qorshe cad oo ku wajahan waxyaabaha la baranayo iyo sida ardayda loogu kala xuli karo markay tahay heer jaamacadeed oo ku xidhan xiisa ardayga oo qudha laakiin aan loo eegin Injineero,dhakhaatiir xoolaad,dhakhaatiir dad,beero,biyo,iyo guud haan aqoonta kala duwan ee la dhigo midkee ayaynu u baahanay in aynu doorkan soo saarno?
Waxaa kaloo lagu dhaliilaa higsiga siyaasada hagaha u ah tacliinta Somaliland manaahiijta kala duwan ee dalka lagu dhigo ee isguulada gaarka loo leeyahay ay ku xayaysiiyaan in ay ardayda dalka gudaha waddanka ku barayaan dalal shisheeye manhajyadooda,iyo waliba madaariista diiniga ah oo lagu dhaliilo in ay kala yihiin fariiqooyin kala duwan oo sabab u noqon kara in ay soo saaraan jiilal culimo ah oo xambaarsan aqoon diimeed isla markaana kala aaminsan fikirro kala duwan.
Arrimahaa iyo kuwo badan oo kale oo lagu dhaliilo siyaasada wasaaradda waxbarashadu in aanay hoos u eegn,ayaa la odhan karaa waxaa sabab u ahaa in aanay inta badan xilka wasaaradda soo qaban madax ku abtirsata bahda waxbarashada marka laga reebo tiro yar oo soo martay.
Haddaba waxaa maanta wasaaradda Waxbarashada Somaliland loo magacaabay oo Madaxweynaha qaranku u igmaday mid ka mid ah aabbayaasha ku suntan tacliinta soona saaray jiilal kala dambeeyay oo ka mid ahaa 1970 naadkii raggii hormuudka u ahaa jaamacaddii la odhan jiray Jaamacadda umadda ee Lafoole waa markii ay jirtay dawladdii la isku odhan jiray Soomaaliweyn.
Waxaana ka soo baxay xilliyadaas jaamacaddaas dadka Maanta Somaliland u ah aqoonta ee dalkan dib intiisa badan ka hawl gala qaybaha kala duwan ee laamaha nolol bushed hadday siyaasad tahay,hadday caafimaad tahay,hadday waxbarasho tahay iyo dhankastoo ay tahayba.
Prof Yaasiin Maxamuud Xiir(Faratoon) wasiirka waxbarashada Somaliland oo ka mid ahaa ruug caddayaasha midhahaa hore soo saaray oo Madaxweyne Muuse Biixi xilkaa u igmaday ayaa ah masuul ku habboon wasaaradda waxbarashada isla markaana dalkan ku hoggaamin kara in ay usoo baxaan arday baratay aqoon dalkan baahiyihiisa dabooli kara oo lagu ababiyay isla markaana la baray aqoonta ay Somaliland u baahan tahay ee ka saari karta saboolnimada isla markaana ka midho dhalin karta ka lib keenida isku filnaansho dhanka waxsoosaarka ah oo Somaliland ay gaadho taana waxaa sabab u noqon kara sida loosoo saaro arday xambaarsan aqoontii ay Somaliland u baahnayd taana masuulka ka midho dhalin kara ee hagaha siyaasada waxbarashada Somaliland loo igmaday waa bare sare Yaasiin Maxamuud Xiir(Faratoon) oo Somaliland dabooli kara baahiyaha ay tabayaan ee dhanka aqoonta.
